ETHANIM (eth-a-nim) HRILHFIAHNA

ETHANIM (eth-a-nim)

Hebrai Bible-ah chuan Ethanim thla hi a lang chiang a, thla sarihna hming a ni. Babulon Saltan hma lama a hming Thin a ni bawk. (1 Lalte 8:2). Saltan hnu lamah chuan TISHRI ti tein a hming an phuah danglam ta thung a.

Bible Calendar-a thlasarihna a ni a; Civil Calendar-a Jews-ten an thla khatna a ni thung. Hetih hun lai hi Jews-te chuan thilpek an inhlan hun leh zu \ha ber ber an siam hun a ni.

Ruah hmasa ngen hun a ni bawk a. Thlasarihna kut, Bawkte te Kut hunin puithiamten kawng zawh meuhvin Siloam Dila tui an chawi a, Temple kal hualin mipuiten an thlir thuap thin. Souvenir Jars (beltung thilpek) mikhualten an hawn a, chutah chuan tui an chhung lut a ... Rih Dil kalten Rih tui saidawium-a an hawn ang nen pawh tehkhin chhin ta ila, a inhmeh khawp ang. Palestina ramin thlai thar an neih leh nan ruah an mamawh avanga hetiang hi ti thin an ni.

Ruah aia pawimawh zawk, Messia khan Amah atanga tuihnna rawn put chhuak, mi tin tana a duhsak zawk chu Thlarau Thianghlim a ni. Chu chu tunlai Jews-ten an duh ve lo; a duhte kha chu Apostol-te leh Chanchin Tha an hrilh pawmtute kha an ni.

Ethanim tih thumal hi Phoenician-ho tawng atanga chhawm a ni a. Perennial (kum-hlun) tihna a ni a, lui luang 'nunna lui' kaihhnawiha hman a ni thin.

A ni lah tak a, Iesua Messia pawh khan "a pum atangin tui nung lui a chik chhuak ang," tih a sermon piap piap kha hriat nawn thar leh chi tak pawh a ni.

Johana 7:37 Tin, kût tiak dawn ni, ni ropui berah chuan Isua a ding a, a au va, “Tupawh a tuihal chuan ka hnenah lo kal sela in rawh se.

7:38 Tupawh mi ring chu Pathian Lehkha sawi angin tui nung luite a pumah a luang chhuak ang,” a ti a.

7:39 (Chung thu chu a ringtuten Thlarau an neih tur thu a sawi a ni; Thlarau chu pek a la ni rih lo, Isua chu chawimawia a la awm loh avangin.)

Thu Puan 21:6 Tin, ka hnenah, “A lo thleng ta. Kei Alpha leh Omega, a Bul leh a Tawp ka ni. Tuihal apiang hnenah chuan Nunna Tuikhura mi athlawnin ka pe ang.

Thu Puan 22:17 Thlarau leh mo chuan, “Lo kal rawh,” an ti a. A hria apiangin “Lo kal rawh,” ti rawh se. Tuihàl apiang lo kal rawh se; a duh apiangin nunna tui hi a thlàwnin la rawh se.

Isaia'n a lo sawilawk tawh —
Isaia 55:1 Hawh u, tuihal apiangte u, tuiahte hian lo kal rawh u, tangka nei lote pawh; lo kal ula, lei ula, ei rawh u; a ni lo kal ula, uain leh hnutetui tangka pe lovin, a man pawh pe lovin lei rawh u.
55:2 chaw ni si lovah engvangin nge tangka in sen? Puar leh fanna ni si lovah engvangin nge in tha in sen? Ka thu ngun takin ngaithla ula, thil tha chu ei rawh u, in nunna chu thil thauvah chuan hlim rawh se.
55:3 In beng rawn dawh ula, ka hnênah lo kal rawh u; ngaithla ula, tichuan in nunna chu a nung ang: tin, in hnênah kumkhaw thu ka thlung ang, Davida hnêna khawngaihna tiam tlatte chu.
55:4 Ngai teh, ani chu mi tin tân hretuah ka ruat a, mi tin tan hruaitu leh hotuah ka ruat a ni.
55:5 Ngai teh, i hriat ngai loh hnam chu i ko vang a, nangmah hre ngai lo hnam chu i hnênah an lo tlàn ang, LALPA i Pathian avâng leh Israel-ho Mi Thianghlim avâng chuan; ani chuan a chawimawi si chia.
55:6 Hmuh awla a awm lai hian LALPA chu zawng ula, a hnaih lai hian ko rawh u:
55:7 mi suaksual chuan a awm dan chu bansan sela, mi fel lo chuan a ngaihtuahnate chu bansan bawk rawh se: LALPA hnênah kir leh rawh se, tichuan anin a lo khawngaih ang; kan Pathian hnênah kir leh rawh se, anin a ngaidam nasa khawp dawn si a.
55:8 Ka ngaihtuahte hi i ngaihtuahte a ni si lo va, i awm dante chu ka awm dan a ni hek lo, LALPAN a ti.

Thlarau Thianghlim puihna tel lo chuan engmah reng reng hi hriatthiam chi a lo ni lo. Hriatthiamna ril tak i neih theih nachhan kha Pathian Thlarau Thianghlimin i mit leh beng a tihvarsak vang che a ni e.

  He thu hi Facebook Group —ETHANIM-a post, khaw hrang hranga unau tam zawkte chhiar atana rawn dah chhuah a ni a.Ethanim awmzia chiang taka rawn hrilhfiahtu Bro. Isaac L. Hnamte chungah lawmthu kan sawi a. Hetiang tak hian hrefiah kilh kelh lo kan ni nachungin a hming hi a mawi a, Chanchinbu hming atan MPKTP Executive Meeting chuan lungrual takin a thlang a. A hming awmzia ang taka a kal kumhlun theih nan member tinte tawiawmna kan mamawh a, puih kan ngaihna apianga min pui turin member-te kan ngen a ni.